Ужо восьмы год запар напярэдадні Старога Новага года раённая рада Таварыства беларускай мовы праводзiла свята «Пружанская ялінка” для дзяцей, якія вывучаюць беларускую мову.
Упершыню ўдзел у калядным мерапрыемстве прынялi дашкольнiкi - выхаванцы ДУА «Яслi-сад №7 г. Пружаны», разам са сваiм выхавальнiкам Максiмовiч I. С. Дзеці з задавальненнем спявалі песні і расказвалі вершы на роднай мове, вадзілі карагоды.
Віншаванні з Калядамі прагучалі і ад вучняў ДУА “Гімназія г. Пружаны”, удзельнікаў фальклорнага клуба “Крынічка”, пад кіраўніцтвам Лялёкінай В.С.
На свята да дзяцей таксама завіталі Дзед Мароз са Снягуркай, Зюзя з Белавежскай пушчы, калядоўшчыкі, якія падаравалі шмат незабыўных момантаў і ўражанняў. А самае галоўнае — дзеці змаглі пазнаёміцца з народнымі звычаямі і абрадамі, убачыць прадстаўленне тэатра “Батлейка”, адчуць народны каларыт гэтага свята. Напрыканцы святочнага мерапрыемства ўсе дзеці атрымалі салодкія падарункі.